بلاد الواق واق اين تقع ؟ وما هي ؟

هناك العديد من الاساطير التي لا تعلم اذا كانت حقيقة ام خيال فمنها من خلط بين الحقيقة والخيال .. و من ضمن هذه الاساطير جزيرة ” الواق واق  ” .. هل سمعت هذا الاسم من قبل ” جزيرة الواق واق ” ؟ هناك قليليون قد مر على اذانهم هذا الاسم اما الكثير فلم يسمع من قبل عن اسم جزيرة الواق واق … في هذه المقالة سوف نتناول تفاصيل عن جزيرة الواق واق .. اين تقع .. هل هي حقيقة ام خيال ..

ماهي جزيرة الواق واق
جزيرة الواق واق هي مكونة من مجموعة من الجزر تم تحديد موقعها حيث توجد في بحر الهند او بحر الصين .. لقد ذكرت الجزيرة في العديد من المقالات والكتب القديمة من ضمنها كتب التراث العربية القديمة .

سبب تسميتها بهذا الاسم ” الواق واق ”
يرجع تسمية جزر الواق واق الى ان الجزيرة الواق واق يكثر بها اشجار هذه الاشجار تثمر بثمار هذه الثمار تأخذ شكل رؤوس نساء يقال ان هذه الثمار التي تاخذ شكل رؤس نساء كان بها تجاويف عند سقوط تلك الثمار كان يمر الهواء بتجاويف الموجودة  بتلك الثمار فتصدر صوت يقول واق الواق .. كما يذكر ايضا عن ابن بطوطة الرحالة العربي ان الواق واق هو اسم صيني كان يطلقه الصنين على بلاد اليابان قديما .

قصة جزر الواق واق
كما `ذكرنا سميت بجزر الواق واق  يكثر بها اشجار هذه الاشجار تثمر بثمار هذه الثمار تأخذ شكل رؤوس نساء  يقال ان هذه الثمار التي تاخذ شكل رؤس نساء معلقين من شعورهم كان بها تجاويف عند سقوط تلك الثمار كان يمر الهواء بتجاويف الموجودة  بتلك الثمار … وكان سكان هذه الجزر معتادين على سماع هذا الصوت كلما مروا بجانب هذه الاشجار و ثمارها ‏.

 قيل عن جزر الواق واق العديد من الاساطير

فقال  محمد بن زكريا الزهوي‏ :

‏” هي بلاد كثيرة الذهب حتى أن أهلها يتخذون سلاسل كلابهم وأطواق قرودهم من الذهب ويأتون بالقمصان المنسوجة من الذهب‏.” و هنا يوضح محمد بن زكريا مدى ثراء جزر الواق واق فهم كانوا يملكون وفرة من الذهب حتى انهم كانوا يصنعوا منه اطواق و سلاسل للحيوانات مثل الكلاب والقرود كما انهم كانوا ينسجون ملابسهم من الذهب الخالص .

لقد اطلق العرب اسم الواق واق على بلدين كانوا ياتي اليهم رحالة و بحارة و تجار .. البلد الاولى تبعا لرأي كل من الفرنسي فران و الروسي كراتشكو فسكي هي عبارة عن اقليم يطل على شرق شاطئ سيا اي شمال الصين  في الشرق الأقصى  .. و البلد الثاني تبعا لرأي كل من محمد بن زكريا الزهوي و كرامرز وهو مستشرق بيريطاني فهم يروا ان  العرب كانوا يكثرون من السفر الى  جزيرة مدغشقر لكثرة الذهب بها فكانوا يمروا على ثمار معلقة تسمى واق واق ووصفوها بنفس الوصف  .

 كما قام ابو عبد الله محمد الادريسي برسم صورة لخريطة العالم في  وجدت في الكتب التراثية كانت هذه الخريطة تتضمن جزر الواق واقالصورة مصغرة, إضغط عليها لمشاهدتها بحجمها الطبيعي.

كما قام ابن عبد المنعم الحميري  بذكر جزر الواق واق  في كتابه الروض المعطار في المواضيع التالية :

” ص 190 في مقالة انكمردة ….. ص 458 في مقالة برطايل…. ص 1509 في مقالة السحاب … ص 1744 في مقالة الصريف …ص 2893 و2894 و2895 في مقالة الواق واق وهي تتحدث عن تلك الجزر ..”

كما ذكر ايضا ابن خلدون جزر الواق واق في كتابه المقدمة

 جزر الواق واق في الأدب
في كتاب الف ليلة وليلة زكرت جزر الواق واق كاسطورة خيالية لا علاقة لها بالواقع ظهرت كاسطورة فقط ….
و في الادب ايضا ظهرت رواية خيالية تحمل اسم الواق واق و هي ” رواية ألس في بلاد الواق واق ” .
” أشعب في بلاد واق الواق ” الكاتب هو  وجيه يعقوب السيد
” البحث عن الترياق في بلاد واق الواق ” الكاتب هو سبعاوي عبد الكريم .

اقرأ المزيد ...

المصري الغلبان .. على مر الزمان !

المصري الغلبان .. على مر الزمان !
( قصة الـ 250 مليون سنة حضارة )
**
ما تستغربش انت قريت العنوان صح .. من 250 مليون سنة .. وبالذات في عصر اسمه ( العصر الترياسي ) كانت فيه قارة واحدة اسمها قارة ( بانجيا ) متجمع فيها كل القارات الموجودة دلوقتي .. يعني كانوا متلزوقين في بعض .. وكان فيه بحر واحد بس من حواليهم .. قارة ( أفريقيا ) بقى كانت في مركز قارة ( بانجيا ) دي .. ومصر كانت في مركز المركز للقارة دي .
في العصر ده ظهرت الديناصورات كأقوى كائن مسيطر على كوكب الأرض .. الناس كانت فاكره ان الديناصورات جت وانقرضت قبل الانسان .. لحد ما جه عالم الحفريات الكبير ( فالديمار جلسيريد ) سنة 1944 واكتشف مدينة قديمة اسمها ( اكامبرو ) في المكسيك فيها اكتر من 3000 تمثال لغالب أنواع الديناصورات ومعاهم بشر ! .. ده تمثال لراجل حاضن ديناصور .. وده واحد تاني راكب فوقيه .. وده واحد تالت بيأكله .. وكل التماثيل دي من العصر الترياسي ده .. من أبو 250 مليون سنة .
في سنة 1932 جه عالم الأحياء الألماني ( أرنست سترومر ) في الصحراء المصرية الغربية واكتشف حفريات لكذا نوع من أنواع الديناصورات أهمهم ( السبينصور المصري ) .. وده من أكبر الديناصورات اللي بتتغذى عاللحوم .. شكله زي ( جودزيلا ) أو شكل الديناصورات اللي فرمهم ( كينج كونج ) في الفيلم .. بس بعد اما يتحط على ضهره زعنفة جبارة بأشواك زي اللي عند التنين كده .. شفتوا الرعب  ! ... واكتشف العالم الالماني كذا نوع تاني كانوا موجودين في مصر في العصر الطباشيري زي الايجيبتوصور والكركرودونتوصور و الدلتادروميوس و الباراليتيتان ( لو معرفتش تقرا اساميهم .. طنش ) .. ومن هنا كان الصراع المتخيل بين المصري الغلبان والكائنات الحلوة دي ..
وقبل ما ندخل في لب الحكاية .. نحب نوصف مين هو ( المصري الغلبان ) بطل قصتنا .. المقصود بيه هو المصري العادي اللي عايز يعيش في سلام وأمان .. بدون ما يكون في موضع سلطة ولا بموضع معارضه ( يعني كافي خيره شره على مر العصور ) .. وحبيت اكتب عنه هنا لاني مالقيتش حد عبره بجمله في التاريخ .. لان التاريخ يكتب للبارزين الاقوياء فقط سواءا في السلطة أو المعارضة .
المهم بما ان الديناصور هو الأقوى فكان المصري الغلبان وسيلته الوحيدة للحياة هي الفلسعة والهرب منهم .. أو يبقى زي اللبان في بوء كل ديناصور فيهم .
*
العصر الحجري القديم الأول
بعد كده جه العصر الحجري الأول من 100 الف سنة او اكتر .. وده اللي الانسان المصري اتعايش فيه مع الحجارة كجزء لا يتجزأ من حياته اليومية .. فسكن الكهوف .. وعمل ادوات اصطاد بيها الحيوانات والطيور .. وساعات كان بيحدف بيها الديناصورات ويعورها ويجري .. وكمان اكتشف النار .. وبقى بيطبخ اللي بيصطاده من الحيوانات والطيور .. وكانت في العصر ده الزعامة له على وجه الأرض .. لأن الديناصورات ساعتها انقرضت .. والسبب اللي العلماء قالوه انه انقرض من العوامل الطبيعية .. وانا شايف ان المصري قدر عليهم وكلهم .. لأن المصري معروف بقوته وجبروته .
*
العصر الحجري القديم الثاني
دخل الانسان المصري في العصر الحجري التاني وده من 10 الاف سنة أو أكتر .. وابتدى يصنع اسلحة متطورة من الحجارة زي الرمح والشاكوش وشوية اطباق وحلل .. وابتدى يعرف الطبيخ ويتغير شكل المصري من جسم كمال الاجسام والعضلات .. للجسم ذو الكرش المقدس من اثر الطبيخ المصري الأول .. والقعدة في البيت .. وبس ياوله وبس يابت .
*
العصر الحجري الحديث
بعد كده جه العصر الحجري الحديث .. وده من 6000 سنة .. واتعلم ساعتها الزراعة زي القمح والشعير وبقى بيربي معيز وخرفان ومواشي .. وابتدت أول حياة استقرار له جنب أرضه .. وبنى له بيوت من الطين والخشب .. ومن هنا ظهرت القرى المصرية مترامية الاطراف اللي محدش فيهم يعرف حد .. وصباح الخير يا جاري انت في حالك وانا في حالي .
*
عصر المعادن
جه بعدين عصر المعادن .. وده لما اكتشف المصري المعادن زي النحاس والبرونز والدهب .. وعمل شوية ادوات منهم وخصوصا من النحاس زي الازميل اللي بيقطع الحجر .. وابتدى يصنع القماش في العصر ده .. ويلبسه بدل جلد الحيوانات وورق الشجر وسعف النخل اللي كان بيجيب له حساسية .. وبيوته بقت بالطوب اللبن .. وفرش بيته حصير .. من البوص ونبات البردي .. ولبس مراته دهب وملى عنيها .
*

الفراعنة
دخل بعد كده عصر الفراعنة .. وده لما مصر كانت قرى وكل قرية منهم في حالها .. بيحكمها شيخ القرية دي .. واما حصل وكل شيخ منهم حب يوسع ويبحبح عن نفسه .. فبقى يهجم عالقرية اللي جنبه ويضمها لحكمه .. وبطلنا ( المصري الغلبان ) في النص مطحون يا إما عسكري نفر .. يا إما أسير نفر برضه .. لحد ما جه أول فرعون مصري معروف تاريخيا وهو ( الملك العقرب الأول ) وده اللي حكم صعيد مصر من 3200 قبل الميلاد ( صعيدي مأصل ) .. وعرف ساعتها المصري الغلبان أول حكم نفس على النفس .. وإزاي يبقى عدد في مجموعة أعداد محدش بيبص له الا انه ينفذ أوامر وبس .. ولو عصى .. ياخد بالبرطوش على أم رأسه .
جه بعد كده الملك ( مينا نارمر ) بعد الملك العقرب بمية سنة .. وراح موحد أقطار مصر كلها فوقيها وتحتها وشرقها وغربها .. وحكمها من الصعيد برضه .. وشهدت مصر في عهده أول دولة متكاملة السيطرة .. والمصري الغلبان ساعتها بقى اسمه في البطاقة ( مواطن مصري ) .
بعد كده جالو ( خوفو وخفرع ومنكرع ) .. وخلوه يبني لهم الاهرامات .. وعرف ساعتها شكل الكرباج على جسمه ازاي .. وازاي يعرف يعيش يوم بحاله برغيف عيش وفحل بصل أحمر .. حسب كتب التاريخ .
*
الهكسوس ومابعدهم
جم بعد كده الهكسوس عبارة عن قبائل بدوية صحراوية همجية .. بيركبوا عجلات حربية بتجرها الخيل .. وعرف ( المصري الغلبان ) أول استعمار في تاريخه .. وشاف ذل الاحتلال .. واتعلم برضه طول فترة احتلال الهكسوس لبلده إزاي يثور عليهم .. وازاي هم يحطوا عليه .. وهكذا لمدة 100 سنة ضحايا من المصريين الغلابة ضد الهكسوس .
لحد ما جه الملك ( أحمس الأول ) وقاد المصريين ضد الهكسوس وتم طردهم وابادتهم عشان مايظهروش عند حد تاني خالص .. وكمان جه بعده الملك ( تحتمس الأول ) وراح موسع حكم مصر وخد السودان كمان عشان يكتر من موارد مصر واغتنت مصر في عهده والمصري ابتدى ياكل نضيف ويلبس انضف ... لحد عصر ( تحتمس التالت ) وقبله عمته ( حتشبسوت ) واللي مصر في عهدهم بقت امبراطورية تشمل السودان والشام وشوية من ليبيا .. وبقى المصري يقدر يدخل البلاد دي بدون تأشيرة .
*
فترة صراع الاديان
مصر ده كله كانت بتعبد كذا اله بكذا عقيدة اكبرهم ( آمون ) .. فجه الملك ( اخناتون ) ولغى كل العبادات دي وخلاهم يعبدوا اله واحد متمثل في لفظ واحد اسمه ( اتون ) .. وجه بعد كده الملك ( توت عنخ أمون ) أبو دقن مكسورة ولزقهواله بصمغ .. فقال للناس سيبوكم من الاله الواحد وارجعوا تاني لكذا اله واولهم ( آمون ) .. فالمصري دماغه لفت .. بس ما باليد حيلة .
*
الامبراطورية المصرية الفرعونية
وبعد كده جم فراعنة مصر العظام زي ( رمسيس الأول والثاني ) .. واللي خلوا مصر والمصريين اسياد العالم القديم بالمعنى الحرفي .. ويقال ان ( رمسيس التاني ) ده فرعون موسى .. لكن الاختبارات اللي اتعملت على جثته في اوربا قالت انه مش هو .
اه كانت فيه عدم مساواه في العصور دي بين الناس .. فكان الفرعون واهله وحاشيته هم اعلى الناس .. والمصري الغلبان ملوش ذكر .. لكن كانت الحياة حلوة وكان له كل الحقوق .. زي البيع والشرا والحق في الزواج والطلاق .. وتقديم الالتماسات للعدالة من وزراء الملك .. وكان دايما العبودية لغير المصريين إلا ما ندر .. ( مفيش في المصريين عبيد يعني ) .
*
الليبيون
جت بعد كده فترة قلت فيها قوة الفراعنة المصريين واشتدت قوة الحكام الليبيين .. فهجموا على مصر سنة 920 قبل الميلاد .. وعلى رأسهم حاكم ليبي اسمه ( شيشناق ) وده اللي كان عايز ينافس سيدنا ( سليمان بن داوود ) في حكمه .. لكن طبعا ما قدرش عليه في فترة حياته .. بس بعد اما توفى سيدنا سليمان خد ( شيشناق ) جيوشه من الليبيين والمصريين وهاجموا كنوز سيدنا سليمان ودمروا القدس وخدوا كنوز يهوزا .
*
النوبيون
بعد كده ظهرت قوة حكام النوبة في ( الاسرة الكوسية ) في سنة 730 قبل الميلاد .. والملك ( اللارا النوبي ) قاد جيوشه لفرم كل اللي ييجي في طريقه .. فخلى ملكه يمتد لكامل مصر والسودان والاردن وفلسطين وسوريا ولبنان لحد جنوب تركيا .. وفرم الفرس والاشوريين والرومان .. والفترة دي معروفه في التاريخ باسم الفراعنة السود .. وبقى عندنا مصريين شكولاتات .
*
الآشوريون
جت بعد كده حملة عسكرية كبيرة قام بيها حاكم آشوري من العراق اسمه ( اسرحدون ) واحتل ببيها مصر بقيادة ابنه ( اشور بانيبال ) وهزم الاسرة النوبية في عهد الحاكم ( طهارقا ) .. لكن المصريين ما استريحوش في عهد الاحتلال الاشوري وكانوا كل يومين في ثورة ضدهم .. بيقابلها بطش كبير من الحكام الاشوريين دول .. لحد ما مصر رجعت تاني لأيد الفراعنة .
*
الإخمينيون الفرس
في سنة 559 قبل الميلاد هجم الفرس على مصر بقيادة ( قمبيز الثاني ) لما استعمل مع المصريين سلاح لم يكن معروفا ساعتها لأي مصري اصيل .. وهو سلاح ( التوقيع والفتنة ) .. فاشترى ذمم مصريين كتير في الجيش المصري وانضموا له ناس كتير منهم في جيشه .. فحارب المصريين بالمصريين .. وانتصر .. وبعد ما انتصر دور في الخونة تقتيل وتعذيب .. وخرب مصر ونهبها .. والمصري الغلبان شاف فترة من اسوأ فترات الحكم في عهد الفرس اسمها ( الفترة الاخمينية ).. لدرجة ان لو ابليس جه يحكمه بدالهم كان هايوافق عليه .
*
البطالمة
جه في سنة 332 قبل الميلاد ( الاسكندر الاكبر ) ومسح بالفرس الارض .. والمصريين اعتبروه ابن الاله والمخلص المنتظر .. لكن بعد ما البطالمة حكموا بعده واستبدوا بالمصريين ونهبوا خيراتهم .. فثاروا عليهم وقتلوا ( بطليموس الحداشر ) .. وجت بعد كده ( كليوباترا السابعة ) وعملت انها من الفراعنة ولبست زيهم .. رغم انها يونانية .. واتجوزت ( يوليوس قيصر ) ديكتاتور روما .. وخلفت منه ( قيصرون ) ولما مات اتحالفت مع ( انطونيو ) فلما اتغلبت هي وهو من ( اوكتافيوس ) انتحرت .. وسقطت مصر في حكم الرومان .
*
الرومان
شهد المصري الغلبان في عهد الرومان أسوء فترة استعباد شافها في تاريخه .. فكان الحاكم الروماني بيعتبر المصريين زى المواشي اللي بياخد منها لحوم والبان .. فرض ضرايب على كل حاجة عندهم .. وما خلاش أي مصري في الحكم او حتى في الجيش .. ولا كان فيه أي نظام اداري يحفظ لاي مصري ادنى حق من حقوقه كإنسان .. فقامت على الرومان ثورات كبيرة .. أضخم واحدة فيهم في عهد الامبراطور ( ماركوس اورليوس ) سنة 180 ميلادي .. اتعرفت بـ ( حرب الزرع ) .. واتمكن ساعتها المصريين بهزيمة الرومان والسيطرة على الاسكندرية .. لكن الرومان جالهم امدادات من روما وقضت عالثورة دي .
*
الساسانيون
رجع الفرس تاني بقيادة ( كسرى الثاني ) في سنة 618 م لما ضعفت الدولة الرومانية .. واحتلوا الاسكندرية وهرب الحاكم الروماني .. وفضلوا في مصر 10 سنين في فترة حكم اسمها ( الحقبة الساسانية ) .. واعطوا المصريين شوية حرية وحقوق اكتر بكتير من فترة حكم الرومان .. لكن مع الاحتفاظ بالطبقية المطلقة بين الحكام الفرس والمصريين الغلابة .. وسية يعني .
*
الأقباط
بعد ما الامبراطورية الرومانية اتبنت الديانة المسيحية .. جه الامبراطور ( هرقل ) سنة 622 للاسكندرية وحط عالفرس وطردهم .. ومشي من مصر بعد كده .. وارسل لهم حاكم روماني اسمه ( سيروس ) واللي المصريين سموه ( المقوقس ) .. وفرض عليهم مذهب مسيحي جديد .. المصريين محدش منهم رضي يقبله ..

*
الامويون
في العهد الأموي سنة 659 رجع ( عمرو بن العاص ) تاني .. بعد ما كان اتشال ايام الخليفة ( عثمان بن عفان ) .. لكن جه بعده حكام امويين كان غالب اهتمامهم بفرض الضرايب على المصريين .. وكانت الضرايب على الاقباط اكتر .. فابتدى كتير منهم يسلم عن غير اقتناع .. فابتدى التمرد ضد الدولة الاموية من المصريين .. وكان ذروة الثورة والتمرد في عهد ( اسامة بن يزيد ) سنة 750 لما فرض على كل مسافر على مركب في النيل 10 دينار رسم عبور .. فالمصريين امتنعوا عن دفع الضرايب .. فبعت لهم القائد ( حنظلة العسكري ) فقتل منهم ما قتل .. لحد ما شاله الخليفة ( هشام بن عبد الملك ) اما الثورة كانت هتعم مصر كلها .
*
العباسيون
جت بعد كده فترة حكم العباسيين لما هرب الخليفة الاموي ( مروان بن محمد ) لمصر .. واتمكن منه العباسيين وقتلوه وبكده زالت الدولة الاموية في مصر وفي الشرق الاوسط .. ماعدا ( الاندلس ) اللي فضلت تحت حكمهم بدون ما تكون دولة مهيمنه على العرب .. وفيه فترات كويسة في الحكم العباسي اشترك فيها المصريين في الحكم زي الوزارة والقضاء .. لكن المصري العادي كان التهميش سيد حياته .. لان العباسيين كانوا بيفضلوا اشراك عناصر غير عربية من قارة اسيا .. وده في كل نواحي الحياة في مصر .. لدرجة انهم كانوا بيتعينوا أئمة للمسلمين في صلاتهم .. وهم لا يحسنون اللغة العربية .
*
الطولونيون
العباسيين من كتر ما استعانوا بالعناصر الغير عربية فكانت سيطرة الحرس التركي على الحكم أكبر من العربي .. فجت فترة حكم الحرس التركي وفي مقدمتهم ( أحمد بن طولون ) .. واسس الدولة الطولونية تحت ظل الخلافة العباسية .. وفي فترة حكمه شهدت مصر اعمال عمرانية كبيرة .. وضاعف ميادين الانتاج .. واصلح الري .. وحمى الفلاحيين واراضيهم من سطو وبطش الحكام والحرس .. وخفف عليهم الضرايب ولغى شوية منها .. واسس نظم تعليمية جديدة .. خلت كتير من المصريين من ابرع الأطباء زي ( بن ترفيل ) و ( بن البطريق ) .. واغتنى المصريين وخصوصا الفلاحين والتجار .. وزهزهت معاهم وبقوا بيلعبوا بالفلوس لعب .. واستمرت الدولة الطولونية 37 سنة .
*
الاخشديون
في نهاية العهد الطولوني ضعف الحكام وضعفت الدولة فقامت الثورات وعمت الاضطرابات انحاء الدولة .. فانتشرت السرقة والنهب .. والمصري وغير المصري ما بقاش آمن على أي حاجة في حياته .. فالخليفة العباسي ( الراضي بالله ) ارسل ( محمد بن طغخ الاخشيدي ) سنة 935 عشان يقمع الاضطرابات دي .. وقد كان .. لكن لما استقر الامر له .. اسس ( الدولة الاخشيدية ) في مصر .. ونهض تاني بالحياة الاقتصادية وازدهرت الصناعة وزاد العمران ورد المظالم .. وقرب المصريين منه .. ورفع علمائهم .. والحياة في عهده كانت مستقره للمصريين بكل خير .. وفضلت الدولة الاخشيدية تحكم 33 سنة .
*
الفاطميون
ظهرت دولة جديدة في تونس بعيد عن الحكم العباسي على المذهب الشيعي الاسماعيلي واسمها ( الدولة الفاطمية ) .. وكانت دايما بتهاجم مصر في فترة الاخشيديين لكن كانوا دايما الاخشيد بيفرموهم .. لحد ما في نهاية عهدهم في مصر الاحوال الاقتصادية تعبت بسبب الحروب الكتيرة مع الحمدانيين في الشرق .. فدخل الفاطميين لمصر من الغرب بقيادة ( المعز لدين الله الفاطمي ) .. وبموافقة كاملة من المصريين ساعتها .. واستقر الحكم لهم ..
بنوا مدينة القاهرة .. واعزوا المصريين وحموهم .. وتقريبا مفيش دولة حكمت مصر اتأثر المصريين بيها قد الحكم الفاطمي .. فمعظم العادات العفوية للمصريين من العهد ده .. وكمان اسسوا الجامع الازهر . وما يضرش برضه إذا جه كام حاكم فاطمي له قرارات مهبوشة شوية زي ( الحكام بأمر الله ) اللي منع أكل الملوخية على المصريين .. وسماها الملوكية .. ومنع أكل السمك .. لكن شهد المصريين رفاهية حلوة في عهد الفاطميين .. وقعدت فترتهم 262 سنة .
*
الايوبيين
في نهاية عهد الفاطميين كترت الخلافات بين القادة على منصب الوزارة .. وباللذات من أكبرهم نفوذا زي ( شاور ) و ( ضرغام ) .. ده استنجد بـ ( نور الدين زنكي ) ملك دمشق المسلم .. والتاني استنجد بـ ( عموري ) ملك بيت المقدس المسيحي .. فبعت ( نور الدين زنكي ) جيش كبير بقيادة ( اسد الدين شريكوه ) وابن اخته ( صلاح الدين الايوبي ) .. وحصلت حروب كتيرة وكبيرة بين الطرفين .. لحد ما انتصر في النهاية جيش ( اسد الدين شريكوه ) .
اتولى من بعده القائد ( صلاح الدين الايوبي ) .. واما اسستب له حكم مصر .. عزل قضاة الشيعة واستبدل المذهب الفاطمي الشيعي بالمذهب الشافعي السني .. . وحول ( الازهر الفاطمي ) .. الى ( الازهر الشريف ) واصبح رمز الاسلام السني في العالم .. وحارب الصليبيين أكتر من حرب .. آخرهم حربه مع ( ريتشارد قلب الاسد ) وفتح القدس ..  .
*
المماليك البحرية
في اخر عهد الدولة الايوبية .. السلطان الايوبي ( الصالح أيوب ) استعان بحرس كتير من اسيا وباللذات من الاتراك والافغان .. وسماهم مماليك .. وقربهم منه وخلاهم على رأس الدولة .. فاما مات ( الصالح ايوب ) المماليك قتلوا ابنه ووريثه ( توران شاه ) وبقت أرملته ( شجرة الدر ) على رأس حكم مصر .. اتجوزت من الامير ( ايبك ) وكان في منصب الاتابك ( القائد العام للقوات المسلحة ) .. واتنازلت له على العرش .
وبعد فترة حكمه دبت خلافات كبيرة بين المماليك لحد ما دخل مصر مرض الطاعون فقضى على كتير من الناس .. وكمان بعدها هجم المغول ( التتار ) على عاصمة الخلافة العباسية في بغداد وبهدلوها وقتلوا ونهبوا لحد ما وصلوا لمصر .. فاتصدى لهم القائد المملوكي ( قطز ) بمساعدة الشيخ المصري ( العز بن عبد السلام ) اللي وحد المصريين بجميع طوائفهم ورا قطز وبقوا حائط صد منيع قدام التتار .. وقدروا يفرموهم في موقعة ( عين جالوت ) .
بعد اما اتقتل ( قطز ) مسك الحكم ( بيبرس ) واتطورت مصر في عهده تطور كبير جدا .. في التجارة والثقافة والفنون والعمارة .. وفي فترة ( الناصر محمد بن قلاوون ) بقت مصر منارة العلم والعلماء في العالم وبقت اعظم قوة دولية بين الدول .
*
المماليك البرجية " الشركس "
في اخر عهد المماليك البحرية مسكها حاكم مملوكي اسمه ( كتبغا ) كان اصله مغولي .. فبالغ في كرم المغول على حساب المصريين .. ورفع الاسعار عليهم وبقت الحال في مصر ضنك وتحت الصفر .. فضعفت الدولة المصرية وهجم عليها البدو والعربان .. ودمروا القرى المصرية ونهبوها .. فمسكها ( المملاليك البرجية ) واتصدوا للحملات دي .. لكن فترة حكمهم ال 135 سنة كان سقوط الحاكم فيها زي السلام عليكم .. لدرجة ان بعض الحكام كانوا بيقعدوا في الحكم 3 ايام بس .. وكانت الغلبة لاتحاد المماليك مش للحاكم .
وبالتركيز على حال المصري الغلبان في الفترة دي .. اتعلم اتجاه جديد في حياته وهو ( الرشوة ) فكانت الحياة اساسا مبنية على مبدأ ( ابجني تجدني ) .. الحاكم بيرشي الخليفة العباسي .. والمماليك بيرشوا الحاكم لما يبقى قوي .. والحاكم بيرشي المماليك لما هم يبقوا اقويا .. والمصريين بيرشوا كل دول عشان يمنعوا ظلمهم عليهم .. واللي بيرشي اكتر بيفوت اكتر .
*
العثمانيون
في سنة 1516 هجم السلطان العثماني ( سليم الاول ) على المماليك في مصر بالمدافع العثمانية الحديثة .. وهرب الحاكم المملوكي ( طومان باي ) واتحامى في بدو الصحراء الغربية .. لكنهم جابوه بالسلاسل وسلموه للسلطان سليم .. وقعد ينادي على المصريين عشان حد ينجده منهم .. .. لكن لا حياة لمن تنادي .. واعدمه السلطان سليم على باب زويله .. وابتدى عهد العثمانيين في مصر .
اتناوب على مصر كذا والي عثماني .. ما اختلفتش سياستهم على المصريين من بطش وضرب بالكرباج .. الا ما ندر .. وكان المصريين كارهين لغالب حكامهم .. وبيثوروا عليهم لدرجة انهم قتلوا الوالي ( أحمد باشا ) سنة 1522 لانه كان بيستعين باليهود على المصريين .
جه بعد كده الصدر الاعظم ( ابراهيم باشا ) واشرك المصريين في الحكم .. وعمل مجلس استشاري بيحكم مصر بـ 14 ادراة .. وكل ادارة منهم بيحكمها ضابط مصري مهمته تنظيم امور العامة وجمع الضرايب .. لان كان بيت المال في مصر مسئول انه يبعت 16 مليون بارة ( عملة عثمانية ) للاستانة .. وحكموا مصر بالنظام ده لمدة 350 سنة .
*
المماليك البكوات
في سنة 1609 زادت الضرائب الوهمية على المصريين وكترت الابتذاذات .. فحصلت حرب اهلية بين الجيش المصري وعسكر الباشا الحاكم .. لكن الباشا هزمهم واعدم ناس كتير منهم .. لكنه بعد كده عمل اصلاحات مالية لتخفيف الاعباء .. لحد ما في نهاية القرن الـ 18 اهمية الباشا نفسه بقت قليلة جدا قدام أهمية شيوخ البلد .. واللي اسمهم البكوات .. ودول كانوا معظمهم مماليك .. وبقت مصر فعليا محكومة بسلطة المماليك مش بسلطة الوالي العثماني .. لحد ما جه ( علي بك الكبير ) وابتدى يحاول يوسع نفوذه لشرق مصر .. فاستعان عليه العثمانيين بشيخ بلد تاني اسمه ( ابو الدهب ) كان وزير لعلي بك الكبير .. فاشتبك معاه وهزمه وبقى الحكم له ... واستبد من بعده البكوات وصرفوا فلوس البلد على ملذاتهم .. وبقت البلد عبارة عن خناقات بي المماليك وبعضها .. والمصريين حيرانين بين دول ودول .. وطفح الكيل منهم .
*
الفرنسيون
في سنة 1798 جت جيوش فرنسا على مصر بقيادة ( نابليون بونابرت ) في حملة توسعية فرنسية .. ودي مكانتش اول مرة .. كان فيه مرتين قبلها واحدة بتاعة ( دان دي برس ) سنة 1221 وواحدة تانية بقيادة ( لويس التاسع ) والمصريين حجزوه عندهم في مدينة المنصورة .
آه .. مفيش حاجة اسمها بنات المنصورة حلويين عشان اهاليهم اتجوزوا من الفرنسيين اللي جم مع لويس التاسع ( ده هتي مصري ليس الا ) يعني سابو الاتراك والمماليك اللي بقالهم الف سنة وجم اتجوزوا فرنسيين .
المهم .. اما جه نابليون اتصدى له المصريين بقيادة الشيخ ( محمد كريم ) لكنهم مقدروش عليه .. وكمان نابليون قالهم انه اسلم وصدقوه المصريين الغلابه وفي مقدمتهم الشيخ ( محمد كريم ) نفسه .. فلما اتمكن منهم نابليون وحط عليهم ( كليبر ) امر باعدام الشيخ كريم .. وقد كان .. وجه الطالب ( سليمان الحلبي ) وقتل كليبر .. واتعدم الحلبي على خازوق .. وشهدت مصر ثورات كبيرة ضد الفرنسيين .. أقواهم سنة 1798 في القاهرة .. فأمر نابليون ضربها بالمدافع .. وقد كان .. فشيوخ الازهر استسمحوه انه يعفوا عن المصريين .. فاستجاب لهم .
وبعد كليبر جه حاكم اسمه ( جاك فرنسوا ) ويقال انه اتجوز بنت مصرية ابوها يبقى من اعيان رشيد .. لكن في عهده مقدرش يصد حملات العثمانيين المدعومة من البريطانيين .. فرجعت مصر تاني لحكم العثمانيين ... لكن خلال فترة حكم الفرنسيين شهدت مصر نهضة حضارية من الحضارة الغربية ماعرفوهاش قبل كده .. زي تطوير الانظمة الادارية وسجلات المواليد والوفيات ونظام المحاكم .. ولو ان الحملة كلها ما قعدتش 3 سنين .
*
الولاه العثمانيين
بعد اما مشيوا الفرنسيين من مصر اتعين خورشيد باشا عمدة للاسكندرية في سنة 1801 .. واول ما مسك الحكم طلب من السلطان العثماني يبعت له مدد من العساكر لتثبيت حكمه .. فبعت له فرق سموها المصريين ( الدولاه ) كانوا حرامية وقطاعين طرق .. نهبوا الاهالي وبهدلوهم .. فاجتمع المشايخ في دار ( الشيخ / عمر مكرم ) عشان يشوفوا حل .. وكان الاهالي من بره عاملين مظاهرات وبيهتفوا فيها ويقولوا (يا رب يا متجلي .. أهلك العثمانلي ) .. فراحوا لـ ( الباشا / محمد علي ) عشان يمسك البلد بدل خورشيد باشا .. وقد كان .. بعد ما السلطان العثماني بعت لخورشيد يوليه منصب تاني في بلد تانية .. ومسك ( محمد علي ) حكم مصر .
ابتدى محمد علي فترة حكمه بالقضاء على أي زعامة شعبية غيره في البلد .. فاول شيء هاجم المماليك وعلى راسهم ( محمد بك الالفي ) المدعوم من الانجليز .. ونفى ( عمر مكرم ) .. وعين مشايخ جدد .. سماهم الجبرتي في كتابه ( مشايخ الوقت ) زي مشايخ الفتا كده .. يؤتمروا بأمر محمد علي وينتهوا بنهيه .. وفي سنة 1811 لما امره السلطان العثماني يروح يحارب الوهابيين في بلاد الحجاز .. راح داعي كل المماليك من ذوي النفوذ لاحتفال كبير في القلعة .. وراح مدور فيهم تقتيل فيما يعرف باسم ( مذبحة القلعة ) .. وما نجاش منهم غير واحد بس وهو ( امين بك ) اللي نط من فوق سور القلعة بحصانه .. وبعدين امر جنوده على صغار المماليك في كل انحاء البلاد فهجموا على بيوتهم ودبحوهم فيها .. وبلغ عددهم 1000 مملوك .. واتخرب بيوت كتير من المصريين اللي كانو شغالين في املاك المماليك دول .
عمل محمد علي اصلاحات ادارية كبيرة في عهده .. واطلق على نفسه ( مؤسس مصر الحديثة ) .. وارسل بعثات تعليمية كتيرة للغرب .. وطور جيشه .. وضم الفلاحين المصريين للجيش .. بعد اما جرب السودانيين واتفشت فيهم الامراض بسبب تغيير الجو عليهم .. وانشأ المدارس العليا .. والصناعات الحربية .. المهم انه في الاخر خلعوه اولاده .. لما مرض بالزهايمر وابتدى يخرف ويهبل .
بعد ( محمد علي ) .. ولاده خدوا الحكم بفترة حكم اسمها ( ولاة مصر من الاسرة العلوية ) .. وكانت لسه تابعة للسلطنة العثمانية .. وبتدفع لها جزية سنوية .. فعملوا معاهدة في لندن سنة 1840 ان الحكم في مصر وراثي لهم .. وشهدت مصر في عهدهم مثلما شهدت مع ابوهم الى حد ما .
*
الباشاوات العلويون
جت بعد كده فترة حكم البشاوات من نسل محمد علي زي ( عباس حلمي الاول ) وده اللي عمل السكة الحديد في مصر .. وبعدين عهد ( اسماعيل باشا ) اللي شاف المصريين فيه السخرة في حفر قناة السويس واتعرضت مصر لازمة اقتصادية كبيرة وتدخل سافر من الانجليز في مصر .. وبعدين ( محمد توفيق ) اللي الاحتلال الانجليزي في عهده كان آمر ناهي .. والمصريين كانوا دايما في ثورات عليه .. وبعدين جه فترة حكم ( عباس حلمي الثاني ) واللي حصل فيها حادثة ( دنشواي ) .. واللي بقت فيها كرامة المصري تحت رجل ادنى عسكري انجليزي .. وللاسف بمساعدة نفاق وتطبيل قادة مصريين .
*
الخديويات العلويون
بعد كده جت فترة حكم الخديويات وهي ان السلطان العثماني يعترف بسلطة كبيرة لحاكم مصر بس تحته على طول وبدون تبعية .. وده بمساعدة مجلس الوزراء ورئيس جامعة الازهر وكبار ضباط الجيش المصري .. لكن بعد الاحتلال الانجليزي لمصر سنة 1882 بقى صلاحيات الخديوي زي صلاحيات عسكري الجيش .. يعني بياخد اوامر وبس .. والقنصل الانجليزي الحاكم الفعلي للبلاد .
*
السلاطين العلويون
في 1914 تم عزل ( عباس حلمي الثاني ) من الانجليز .. واتقطعت علاقة مصر بالدولة العثمانية ودخلت مصر في حقبة عهد السلاطلين واتعين ( حسين كامل ) سلطان لمصر .. وبكده بقت مصر بسيادة بريطانية بالكامل دون ادنى سيادة للدولة العثمانية .. وبسلطة مباشرة في ايد مقام المفوض السامي البريطاني .. والمصريين شافوا الذل على ايديهم سحل وسجن وتعذيب .. فعليت عندهم الروح الوطنية .. والمصري الغلبان اللي كان ماورهوش غير لقمة عيشة بقى بينزل يتظاهر ضد الانجليز .. وبقى يطلع يقول ( الجلاء التام أو الموت الزؤام ) ومحدش يسألني على زؤام دي .. اسألوا عنها محمد عطية .
*
الملوك العلويون
وقامت في عهد السلطان ( فؤاد الاول ) ثورة 1919 بقيادة ( سعد زغلول باشا ) .. واصدرت بريطانيا في سنة 1922 تصريح بانتهاء الوصاية على مصر وان مصر دولة مستقلة ونصب السلطان ( فؤاد الاول ) نفسه ملك على مصر .. لكن في الحقيقة بريطانيا ما شالتش اديها من على مصر .. وفضلت تتدخل .. فبقى يجيلها قادة وزعماء يجمعوا حواليهم المصريين ويقاوموا الانجليز زي ( مصطفى كامل ) و( محمد فريد ) .. لحد ما في عهد ( الملك فاروق ) النفوذ الانجليزي استفحل وحاصر قصر عابدين بالمدافع عشان يجبره يخلع الوزارة اللي رئيسها بيأيد هتلر ضد الانجليز .. وقد كان .. وده خلى (جمال عبد الناصر ومحمد نجيب ) يثوروا عليه بحركة الضباط الاحرار .
*
رؤساء الجمهورية
*
محمد نجيب
في عهد رؤساء الجمهورية اتغير وضع الحكم في مصر من ناس اصولهم مش مصرية لناس اصولهم مصرية 100 % .. اول حاجة اتعملت للمصريين بعد ثورة يوليو هي قانون الاصلاح الزراعي والغاء الاقطاع وزوال الالقاب العثمانية زي الباشا والبيه ( بس بقت بتتقال للضباط بس ولحد دلوقتي ) .. وفلاحين كتير استفادوا من القوانين دي بملكية اراضي ماكانش حد يحلم يوم فيهم يمتلكها .
كان محمد نجيب زعلان من سلب الاراضي من الاقطاع واعطائها للفلاحين عشان حرام .. فثار عليه المنتفعين من القوانين دي .. فاستغلها لصالحه جمال عبد الناصر وخلع محمد نجيب ومسك هو الرئاسة .
*
جمال عبد الناصر
دخلت مصر في مرحلة تانية وهي حكم الضباط لمصر .. وكان الرأي الاول والاخير لهم .. فالسجون كانت الملاذ الاول لأي معارض .. اما المصري الغلبان اللي في حاله كانت الدنيا فل ولا كان شايف حاجة من ده رغم ارتفاع الاسعار ودهولة الحالة الاقتصادية بس كانت الحالة ماشية معاه .. وهو ده اللي مجد جمال عبد الناصر وهو حي وهو ميت .
خلال فترة عبد الناصر زادت مشاعر الوطنية والقومية العربية للمصري .. وكان التحاقه بالجيش هو الشرف الاول له ايا كان الجيش ده هيحارب مين .. لكن للاسف اتاخدت سينا ومشاعر الخزي والعار بقت في قلب كل مصري .
*
انور السادات
جت فترة السادات وشال حكم الضباط بثورة التصحيح .. واسس لفترة حكم رجال الاعمال في الحزب الوطني .. واللي كملها مبارك من بعده .. واما انتصر السادات في حرب اكتوبر 1973 .. واتقرب من امريكا وعمل الانفتاح الاقتصادي .. غليت الاسعار واستغلها الشيوعيين والناصريين في مظاهرات كبيرة خدت في صفها غالب اطياف الشعب المصري .. فضرب السادات الشيوعيين بالجماعات الاسلامية وفي مقدمتهم الاخوان .. لكن كانت نهايته بعد اتفاق السلام مع اسرائيل وكرهه من غالب الاسلاميين .. واتقتل وهو في احتفال اكتوبر سنة 1981 من وحدات في الجيش نفسه .
*
حسني مبارك
جه حسني مبارك .. واسس فترة جديدة لزيادة نفوذ رجال الاعمال وانعدام الفئة الوسطى من المجتمع المصري .. فاما اغنياء واما فقراء .. واسس لدولة يحكمها الشرطة والجيش .. بصلاحيات اكبر من أي سلطة قضائية او تشريعية .
اتطحن المواطن المصري الغلبان رغم ان فيه مشروعات قومية كبيرة اتعملت .. لكن نتايجها ما عاداتش عليه باللي يتمناه .
*
ما بعد الثورة
قامت ثورة يناير 2011 واتشال مبارك ورجالته .. وساعتها افتكر ( المصري الغلبان ) انه هو اللي هيبقى عالحجر .. فاما ملقاش له مكان .. عمل بنصيحة مبارك وكبر مخه .. وعاش حياته زي ما هي ماشيه ..
وكان ولازال دائما على الرف .. ومحدش حاسس بيه الا ما ندر .. وكل من له صوت عالي بيستغل معانته لمصلحته هو .. لكن أمله في ربنا كبير يصلح له الحال ...
روح ياشيخ ربنا يصلح لك الحال .. زي ما مققت عنين الناس قراية .. قولوا آمين .

اقرأ المزيد ...

هاتف يحسب كمية الماء داخل جسمك وينشط خلايا المخ وبها برنامج للرياضة

أنت فى ايدك smart phone دلوقتى ؟؟ تعرف حاجة كده اسمها play store ؟؟؟
طب خد لفة فى البوست ده ، و ادعيلي ، بس بعد ما تنزل الapps دى
1- Congito
برنامج عظيم لتمارين الدماغ يومى وينشط خلايا الدماغ بطريقه محفزه و لذيذة ..
2- Duolingo
تتعلم اي لغة في العالم بطريقة ابداعية .. بيبدا من الصفر و خطوة بخطوة .. انجلش او فرنساوى او المانى او اسبانى وغيرهم ..
3- Athan هيفكرك بالصلاة بطريقة تخاطب الدماغ.
4- water tracker هيفكرك بشرب ماء بحسب احتياج جسمك (الطول والوزن والانشطة) لانه من الخطأ صحياً ان يصل جسمك لمرحلة العطش .
5- Udemy & Coursera اشهر apps لكورسات فى كل المجاﻻت بس كلهم بالانجلش !! .. طب انا عايز عربي والانجلش بتاعى مش مساعدنى خش ع رقم 6 و 7 و
6- TED بيديك فرصه تحميل الفيديوهات و يقدم لك كل الفيديوهات اللى TED عملها .. وممكن تختار ان اللغة تبقي عربي و بالتالى كل الفيديوهات هتبقي مترجمة ..
7- رواق ... فيه كورسات كلها عربي عن اى مجال فى الدنيا انت عايزه ، سواء الموقع او الapp
8- TalkEnglish Standard افضل ابلكيشن على الاطرﻻق عشان تتعلم انجلش .. و هتﻻقي فيه دروس للconversation حاجات للwriting و كل اللى هتحتاجه ، واللى مش هتحتاجه
9- أذكار  .. هيجبلك اذكار  فى جنب الشاشة كل شوية طول ما انت فاتح الموبايل .. بالاضافة ان فيه اذكار الصباح والمساء والفروض
10- weather clock and wedget هتعرف منه الجو و المطر ﻻسبوع على الاقل قدام و درجات الحرارة .. و عن تجربة هو ابلكيشن حلو جدا و مفيد للى بيسافروا
11- Never miss fajr هيصحيك تصلى الفجر ومش هيسكت غير بعدد ضغطات معينة تحددها او مسائل رياضية تحلها مثﻻ
12- حركات " تشكيل حروف اللغة العربية "
13- SWorkit برنامج للرياضة، سواءً قوة او لياقة والخ وجبار لانك تختار التوقيت والمدة والنوعية.
14- عربي: هو قاموس انجليزي عربي وبيديلك كل المرادفات والاعراب اللغوي لها .
15- ABA برنامج ممتاز للغة الانجليزية عن طريق فيديوهات ويطلب منك بعد تكتب ملخص عنها واستفدت ايه ..
16- HERE برنامج مهم جدا للخرائط والطرق والجميل فيه لا يحتاج لانترنت ليدلك على مكان معين لانه يحمل الخرائط على جهازك.
17- Oxford غني عن التعريف طبعا لمن يبحث عن قامومس انجليزي انجليزي
18- Wattpad للناس اللى بتحب تقرا pdf ده هيساعدهم اوى ..
19- Sleep cycle برنامج استخدمه على الاقل ٣ مرات فقط وانت نايم تجنبا لضرره ولكن يقولك امتى تعمقت بالنوم وهل فعلا ارتاح جسمك وعقلك ولا لأ. برنامج غريب grin emoticon بس لسه هجربه ..
20- C S برنامج افضل من اي سكانر طبيعي بوضوح عالي وقص الورقة واحلى خاصية الماجيك.

اقرأ المزيد ...